航運股買唔過1919, 2866, 316, 1199

青心直說：航運股買唔過
31.8.2009 Appledaily 胡孟青

幾隻大航運股相繼出半年業績，中國遠洋（ 1919）最誇張，舊年半年賺 151億元人民幣，今年半年幫你蝕番成 46億元人民幣，期內總運力 55.4萬標準箱之集裝箱貨運業務，貨運量同比下跌 21.9%。齋做集裝箱貨運嘅中海集運（ 2866）舊年仲賺緊 6.9億元人民幣，今年行咗一半就蝕 34億元人民幣，貨運量下跌 11.4%。惟獨做碼頭生意的中遠太平洋（ 1199），仲有 1億美元進賬，唔使見紅叫做跑贏九條街。

中海集運管理層話， 7、 8月份貨運量同運價已回升，加上有國策扶持，下半年有望改善。另邊廂，中國遠洋就冇睇得咁樂觀，話單從近期情況，仍好難講係咪真係復蘇得咁快。

中海集運單係 8月，除太平洋航線外，均加價 1倍。佢哋上月聯同全球 14間航運公司簽署的《泛太平洋穩定協議》（ TSA），講好 8月開始，往返亞洲至美國每個櫃加價 500美元，聽落好似改善唔少。

最壞情況似乎未過去
不過，連全球最大的馬士基集團，上半年單係集裝箱貨運量跌 7%，唔見近 10億美元，好彩有港口碼頭等業務撐住，唔係肯定唔止蝕 5.4億美元咁少。馬士基更預期，全球運量仍供過於求，下半年表現只會保持平穩。

多間公司都唔敢講止蝕，不禁令人擔心經濟最壞的情況係咪真係過去。
呢次美洲航線有得加費，除咗係旺季因素，都反映航運公司之間的割喉式減價戰已暫告一段落。但唔減價係咪代表收入多咗？梗係唔係。有份加入加價行列的陽明海運早前透過傳媒表示，以目前的貨運量，連 500蚊的加幅都好勉強，東方海外（ 316）更形容，歐美零售商根本唔敢買入太多存貨。

請教行內人，佢話自己有個經營百貨公司嘅客仔，前年好市時買落好多存貨，今年喺大陸只係買夠聖誕賣嘅 items就收手，仲點敢大手入貨。

入咗貨嘅仲有航運公司自己，過去幾年不斷擴張運力、買新船。根據 AXS-Alphaliner機構評估，目前全球閒置運力佔整體運力 10%，今年餘下時間都唔會有改善。唔怪得中集運自己都爆響口話內地運力過剩，下半年要減。睇嚟其他航運公司都要一齊學佢做「龜仙人」，縮得就縮，齊齊度過呢個經濟寒冬。
.