《青姐手記－胡孟青》思捷有不能說的秘密？

(from: http://www.etnet.com.hk/www/tc/news/hot_news_detail.php?newsid=ETN19083171)

31/08/2009 11:24《青姐手記－胡孟青》思捷有不能說的秘密？
　　

《青姐手記》上周五（２８日）適逢期指結算，大戶盡力將指數夾低，中央亦幫下手，由溫家寶親口話要加大力度調整過剩產能，結果無論係大又好、細又好，鋼鐵、資源、房產、有色、水泥以至玻璃都被「一Ｑ清袋」洗白白。　

資金梗係危險速逃，跟大行報告走之餘，最好有業績「支持」。所謂支持，其實係無論喺升市跌市都好，畀一啲理由去支持大戶將股價舞高弄低。思捷（００３３０）難逃一劫，瞬即成為大戶晚餐，業績發布後慘遭基金洗倉，單日市值蒸發１１２億元。　　　

近期在花旗國，高盛被監管機構調查緊，到底有無喺分析員寫報告前，將股票貼士先畀自己大客，等佢地上晒車後先出報告唱好，好讓大客仔沽貨獲利。查實呢招絕世好橋坊間一直有傳係行內「不能說的秘密」，呢次俾傳媒踢爆兼證據確鑿，高盛可以話周身蟻。自己啲細客攞唔到獨家貼士當然係唔高興，更加輸埋公司多年來建立的形象。　　　　　　　　　　　　　　

＊業績前與後，股價天與地＊　　
唔知係咪巧合，喺思捷公布業績前，當時大行仲未出報告調低評級，其股價喺八月中已開始跑贏大市，仲破頂式上破近一年高位６２元。當內房、資源股等已失守多條移動平均線之際，思捷股價仍勢如破竹，以一隻咁受外圍經濟影響的股份，有咁好表現實在令人大惑不解。　　　

就係呢風平浪靜的時候，原來醒目仔經已悄悄派貨出街，結果喺思捷主席高漢思話「下半年業績難有改善」的大力「支持」下，大行當然唔執輪，最少有三間大行調低評級，最差一間花旗只係睇３４蚊。　　　

單係調低評級未夠殺傷力，摩根士丹利踩多兩腳，先喺開市前出報告，兩句鐘後同一個分析員又出短期策略報告，出口術話喺未來４５日，有七至八成機會下跌。心水清之士，一定記得高漢思不滿意業績表現的言論，其實去年業績後亦有講過，只係當時大行並無為此而大做文章。　　

大摩狙擊得咁狠，有缸邊人估其實一早做晒野，推低股價後當然可再吸。相反高盛就有啲漏夜趕科場，只好大玩醜女大翻身，將評級調高至中性睇６１元，更將佢剔出確認沽出名單。　　　　　　　　　　　　　　

＊這邊掟思捷，那邊追李寧＊　　
出業績後被大行聯手夾擊，超賣完可以再超賣。相反，全年賺多４２％的李寧（０２３３１），大戶基金追到索氣，隨時倒轉頭，超買完再超買。皆因業績出之前，基金淡友不問價將佢沽到落１００天線，而睇埋當日思捷破頂表現，甚有沽李寧，買思捷ＰＡＩＲ　ＴＲＡＤＥ之感。

眼見業績後大戶喪追李寧，擺明有人睇錯市。唔通真係咁天真咁傻，以為咁做ＰＡＩＲ　ＴＲＡＤＥ有糊食？

1.9.2009《獨立股評人　胡孟青》

.